LAOAG CITY – Kinumpirmaran ni Police Major Joseph Baltazar, ti Chief of Police iti ili ti San Nicolas a napaluspusanen ti suspek iti pammaltog a ni Louie Lardizabal, agtawen ti 45, awanan asawa, construction worker ken residente ti Brgy. Taggat Norte, Claveria Cagayan.
Segun ken ni Baltazar, insanud ti biktima a ni Warren Pillos, agtawen ti 45, awanan asawa, construction worker ken residente ti Brgy. Peralta iti ili ti Dingras ti kaso a Frustrated Homicide a naipila kontra iti suspek.
Inpetteng ni Baltazar nga awanen ti serbina ti kaso a naipila iti piskalya kontra iti suspek gapu ta awan ti sabali a testigo malaksid iti nasao a biktima.
Mainaig iti daytoy, inbaga ni Baltazar a ti paltog a nausar iti krimen ket nagtalinaed iti kustodyar ti PNP-San Nicolas ken naituding nga iturnover da iti Ilocos Norte Police Provincial Office (INPPO).
Inbatadna a pinakawan ti biktima ti suspek gapu ta agkatrabahoan dagitoy iti maysa a construction site iti ili ti San Nicolas.
Maipalagip nga aksidente a nakalbit ti suspek ti paltog a calibre 9mm rason a natamaan ti akin-kannawan a luppo ti biktima.
