LAOAG CITY – Mapilaan iti kaso a murder ti suspek iti napasamak a panagtagtagbat iti Barangay 19, San Lorenzo iti ili ti San Nicolas.
Nabigbig ti biktima a ni Pedro Teja Oriente, agtawen 51, naasawaan, idinto a ti suspek ket ti kayongna a ni Efren Dumrique y Guira, agtawen 55, naasawaan, agpada dagitoy a residente iti Sitio Tamurong iti nadakamat a barangay.
Segun ken ni Police Capt. Randy Damo, ti chief of police iti ili ti San Nicolas, rimuar iti imbestigasyon da nga addan ti dati a susik ti biktima ken suspek gapu iti maipagarop a sanikua.
Kuna na a naamoan da pay a tunggal agawid ti suspek a nabartek ket agkarkaryar.
Innayon na a sakbay a napasamak a panagtagtagbat ket kinaryar ti suspek ti biktima apaman a nakasangpet iti balayda a nakainom ti arak a nangitunda ti panagbinnara da.
Iti panagriri dagiti dua ket napan nangala ti buneng ti suspek iti uneg ti balay da ken intagbat na iti ulo, abaga ken dadduma pay a paset ti bagi ti biktima a nangitunda ti pannakatay na.
Kabayatanna, inlawlawag ti suspek a napanna dinamag no apay nga inlako da ti ginatang na a semento a pangsemento da koma iti sango ti balayda ngem maipagarop a pinagsawan ti dakes ti biktima kalpasan na ket napan nangala ti tubo nga ipang-or na kenkuana.
Inpalgak na a nagtaray ngem natublak iti ayan ti buneng isut gapuna nga innala na ken ipang-or na koma laeng ngem saanna ninamnama a napigsa ti pannakaitagbatna iti biktima.
Inadmitir na nga adda ti panagbabawi na ngem nalpasen isut gapuna a ti laengen maaramidan na ket ti agkiddaw ti pammakawan kangrunaan na iti kabsat na nga asawa ti biktima.
Nagtalinaed ti suspek iti Philippine National Police iti ili ti San Nicolas.
