LAOAG CITY – Inpakaammo ni PLt.Col. Joseph Baltazar, Hepe ti Philippine National Police ditoy Siudad ti Laoag a manamnama a mapilaan ti kaso a murder ti suspek iti pammagkong iti likod ti Kapitolio Probinsial a sakupen ti Barangay 13 ditoy Siudad.
Segun ken ni PLt.Col. Baltazar, nabigbig ti biktima a ni Mark Vincent Toledo, agtawen ti 18, awanan asawa ken residente ti Brgy. 46, Nalbo ditoy Siudad ti Laoag idinto a nabigbig met ti suspek a ni Alexis Arone Sta. Maria, adda iti umno tawen, Grade 11 student ti Ilocos Norte College of Arts and Trades ken residente ti Brgy. 1 ditoy Siudad ken saan met pay a nabigbig dagiti kakaduana a naglibas.
Inbatadna a basar iti naisayangkat nga imbestigasion, agarup alas dos y media iti parbagon di kalman ket bayat a nakalugan ti biktima kaduana dagiti barkadana iti motorsiklo a Honda Click a nagturong iti sango ti maysa a tiangge tapno gumatang ti sigarilyo ngem saanda a nakagatang gapu ta nakarikep daytoyen.
Nupay kasta, inlawlawagna nga adda ti dua a lallaki a nakatugaw iti asideg ti tiangge nga immasideg iti grupo ti biktima a nagsasaoda ti saan a napintas a sarita agingga a nagriri dagiti dua a grupo.
Kunana a kalpasan ti sumagmamano laeng a segundo ket nagtataray dagiti dua a kadua ti biktima idinto a saan nakataray ti biktima agingga a natulid daytoy iti kalsada.
Inpalgakna nga adda ti limmabas a nakamotorsiklo nga isu ti nakakita iti biktima a nakadasay iti kalsada a dagus a napan dimmawat ti tulong tapno itaray iti ospital.
Inbagana a basar ken ni Dr. Albano ti Governor Roque B. Ablan Sr. Memorial Hospital ket nagsagaba ti biktima ti bagkong iti nagduduma a paset ti bagina usar ti saan pay a masinunuo a natirad a banag a nangitunda ti pannakatayna.
Innayonna nga immunan a simmuko ti suspek iti National Bureau of Investigation ngem nai-turn over met laeng daytoy iti Philippine National Police ditoy Siudad ti Laoag.
