(UPDATE)LAOAG CITY – Sabali pay a kaso ti naipila kontra ken ni Jordy Oppic agtawen ti 28, awanan asawa, construction worker ken residente ti Bgy. 5 Davila, Pasuquin.
Daytoy ket kalpasan ti agtultuloy nga imbestigasyon ti PNP-Pasuquin mainaig iti pannakatay ni Elizabeth Villanueva, agtawen 24, addaan ti live-in partner, ken residente ti Bgy, Ngabangab iti nasao met la nga ili.
Naamuan nga idi kalman ket inpila ti PNP-Pasuquin ti kaso a murder kontra ken ni Oppic.
Maipalagip a ni Oppic ket dati a live-in partner ni Villanueva a nabirukan a natay iti Bantay Banayoyo, paset ti Bgy. 27 Sulbec iti nasao met la nga ili a nagsagaba ti naruay a bagkong kadagiti nagduduma a paset ti bagi na.
Maipalagip pay nga adda imnun-unan a kaso naipila kontra ken ni Oppic gapu iti pannakaduktal kenkuana ti maysa a paltog ken small plastic sachet a naglaon iti maatap a shabu idi birbiruken da daytoy.
