LAOAG CITY – Isagsaganan ti PNP-San Nicolas ti kaso a maipila kontra iti suspek a naggandat a mangitaray iti lugan ti maysa a Bgy. Chairman iti ili ti San Nicolas.
Nabigbig ti biktima a ni Bgy. Chairman Victor Quitoras iti Bgy. 4 iti nasao nga ili.
Nabigbig met ti suspek a ni Reymund Blen agtawen ti 32, awanan ti asawa ken tubo iti Lagangilang Abra ken cartaker iti proyekto Shawin Construction iti Bgy. 2 ti ciudad ti laoag.
Segun iti PNP-San Nicolas, nakita dagiti agnagan iti Edgar Estrada ken Ranjhive Kumar , agpada a residente iti nasao a barangay ti suspek nga inturong na ti lugfan ti kapitan a maysa a Toyota Tamaraw FX nga addaan iti plate no. TRZ 624.
Nakita laengen ti nasao a lugan a naabandunar iti Bgy. Road nga agturong iti karayan.
Maipalagip nga inparking ti kapitan ti lugan na iti malem ti July 22 iti asideg ti balay da ngem iti bigat ti July 23 ket awanen ti nasao a lugan.
Babaen ti koordinasyon ti PNP-San Nicolas ken ti PNP-Laoagf ket natiliw ti suspek iti paset ti Bgy. 2 ditoy ciudad ti Laoag.
