LAOAG CITY – Kinumpirmaran ni Police Supt. Mar Louie Bondoc, chief of police ti PNP-Laoag a maibilang a high value target ti natiliw iti buy bust operation a ni Arwin Mina iti Barangay 51-A, Nangalisan ditoy ciudad ti Laoag.
Segun kenni Bondoc, nabayagen a sipsiputan dagiti otoridad ni Mina gapo iti panagoperar nupay simmuko idi 2016.
Inbatad na a ni Mina ket agsup-suplay ti iligal a droga ditoy Ilocos Norte ken kabangibang a probinsya kas iti Ilocos Sur ken Cagayan.
Kuna pay n Bondoc a ni Mina ket dati a miembro ti Calina Group, ti grupo nga adda ti pakainaigan na iti panagikot ti iligal a droga.
Iti agdama ket nagtalinaed iti kustudiyar ti PNP-Laoag ti nasao a suspek ken manamnama a mapilaan ti kaso ita nga aldaw gapo iti panaglabsing na ti RA 9165.
Maipalagip a balligi a natiliw ti suspek bayat ti kaadda na iti maysa nga hotel iti nasao a barangay babaen ti naiyuswat a drug buy bust operation ken nakumpiskar dagiti 11 a sachet a maipagarop a naglaon ti shabu.
