LAOAG CITY – Inbatad ni Police Chief Inspector Roldan Suitos, ti chief of police iti ili ti Sarrat nga agtultuloy ti imbestigasyon da tapno maamoan da ti pudno a kinatao ni Rogelio Calmang, agtawen ti 56, naasawaan ken residente ti Barangay Puttao, Calanasan, Apayao.
Daytoy ket kalpasan a natiliwan dagiti kameng ti PNP iti maysa a
kalibre 45 a paltog, nga addaan ti magazine ken pito a bala na, maysa pay a magazine ti isu met laeng a paltog ken adda karga na a walo a bala ken maysa a bala para ti M14.
Maipalagip a natiliw ni Calmang iti checkpoint nga inwayat dagiti kameng ti PNP Sarrat iti Brgy 1 iti nasao nga ili.
Segun ken ni Suitos, ni Calmang ket nagpabigbig a maysa a kameng ti CAFGU ken barangay kagawad idiay Calanasan, Apayao.
Inpakaammo ti opisyal nga awan ti naipakita ni Calmang nga umiso a papeles na ti paltog na ken saan a nasungbatan ida ti suspek no apay nagna iti ili ti Sarrat ken no sadinno ti pagturungan na.
