LAOAG CITY – Boluntario a simmuko kadagiti otoridad ti suspek nga akin-utek iti pammaltog iti Barangay Morong iti ili ti Badoc.
Nabigbig ti biktima a ni Guillian Luisa Rivera, agtawen ti 32, awanan asawa ken self-employed idinto a ti suspek ket ni Rizel Idian, agtawen ti 33, naasawaan ken ahente nga agpada dagitoy a residente ti Barangay La Virgen Milagrosa it ili ti Badoc.
Basar iti pannakisarsarita ti Bombo Radyo Laoag News Team iti suspek, ditoy nga inadmitirna mismo nga isuna ti adda iti likudan iti napasamak a pammaltog.
Segun kenkuana, adda ti inbaon ken binayadanna a maysa nga indibidual a taga probinsia ti Ilocos Sur tapno butbutngen laeng ti biktima.
Nupay kasta, inbatadna a saanna nga inpagarup a papatayenna metten ti biktima.
Inlawlawagna a naaramidna laeng ti nasao nga insidente gapu iti utangna a dimmanon iti dua a milyon a pisos a saanna pay a nabayadan iti biktima.
Innayonna a simmuko daytoy gapu ta saanen a kabaelan ti konsensiana iti napasamak.
Mainaig iti daytoy, kuna ni Roldan Idian, agtawen ti 38, mannalon ken asawa ti suspek a nakigtot daytoy idi naammoanna ti inaramid ti asawana nga akin-utek iti pammaltog.
Inpettengna a saanna nga ammo no apay a nakadakdakkel ti nagbalin nga utang ti asawana ken no ayanno ti nakaikabkabilanna ti dakkel a gatad ti kuarta.
Kabayatanna, dumawdawat ti pammakawan ti suspek iti sibubukel a pamilia ti biktima gapu iti inaramidna nga insidente.
Immuna iti daytoy, pimmusay ti biktima kalpasan a napaltu-paltogan ti sumagmamano a daras a puon metten ti nakatayanna.
Iti agdama, agtultuloy ti panangiwayat ti imbestigasion ti Badoc Municipal Police Station mainaig iti nasao a pammaltog.
