LAOAG CITY – Napilaanen ti kaso a frustrated homicide ti suspek iti napasamak a pammagkong iti Barangay Capurictan iti ili ti Solsona.
Daytoy ti inbatad ni Police Capt. Randy Damo, ti Chief of police iti ili ti Solsona.
Maipalagip a kinumpirmaran ni Damo a nasugatan dagiti biktima nga isuda Rual Agno, agtawen ti 34, naasawaan, maysa a driver ken ni Mark Neil Balmes, agtawen ti 27, awanan ti asawa, idinto a ti suspek ket ni Rommel Agno, agtawen ti 52, naasawaan, mannalon ken agpapada dagitoy a residente iti nasao a barangay.
Segun kenni Damo, dagiti biktima, suspek ken maysa pay nga indibidual ket naggi-inom kageddan ti panag-videoke da idi adda ti saan a nagkinnaawatan ti suspek ken ni Rual gapo iti song book.
Inlawlawag na a maysa kadagiti kinainuman da ket binakal na ti bassit a bato ti song book nga iggem ni rual ken ti napabasol ket ni Rommel isut gapo na nga inbaot na suspek ti nadakamat a song book.
Gapo iti daytoy, nagawid ti suspek ngem idi nagsubli ket addan ti kutsilyo nga iggem na ken binagkong na ni Rual iti akin-kannawan nga ima na.
Kunana a ginandat ni Mark Neil ti naganawa nga isu ti nangitunda ti pannakasugat ti kikit ti ima na ken rumrumuar a naikkat.
Naitaray a dagus dagiti biktima iti Rural Health Unit iti ili ti Solsona idinto a ti suspek ket natiliw pakairamanan ti 16 inches nga inusar na a kutsilyo.
Kabayatanna, inbatad ti suspek a napunwan laeng isuna gapo ta maipagarop a masansan ti panangdangran kenkuana ti kaanakan na a ni Rual ngem binaybay-an na daytoy iti kallabes.
Kunana a nasayaat isuna a tao ngem nasakit ti nakem na gapo iti kanayon a panangdanog kenkuana ni Rual agingga a saan nan a nalapdan ti bagbagi na.
