LAOAG CITY – Nagtalinaed iti kustodyar ti Criminal Investigation and Detection Group (CIDG) – Ilocos Norte ti suspek iti napasamak a pammaltog iti Barangay 23 ditoy ciudad ti Laoag.
Daytoy ti inpakaammo ni Police Major Romnick Subia, ti team Leader ti Criminal Investigation and Detection Group (CIDG) – Ilocos Norte kabayatan ti naiyuswat a press conference iti Ilocos Norte Police Provincial Office (INNPO).
Segun ken ni Subia, babaen kadagiti inyuswat a follow-up investigations ket naala da ti cellphone number ti suspek ken ti pannakisarita da kenkuana ket inkari na a nakasagana a sumuko tapno maipaay na met ti takder na no apay a naaramid na ti krimen.
Kuna na nga iti isusuko ti suspek ket bitbit na ti maysa a Gloc 17 nga addaan ti magazine nga adda karga na a tallo a bala a maipagarop nga inusar na iti krimen.
Innayon na a mapilaan ti murder ti suspek ngem makaammon ti prosecutor a mangtingiting iti daytoy.
Mainaig iti daytoy, inlawlawag ni Subia a ti biktima a ni Albert Balbas ti natiliw da idi Pebrero 2022 iti buy-bust operation.
Immunan a binigbig ni Police Lt. Col. Joseph Baltazar, ti chief of police ditoy ciudad ti Laoag ti suspek a ni Fernando Lucas y Manegdeg, taga Barangay Buttong ditoy ciudad ti Laoag.
Inpalgak ni Baltazar a basar iti pamilya ti biktima, nagturong ti suspek iti balay da a kumarkarit idinto a ti bersyon ti suspek ket napan laeng iti lugar tapno bisitaen dagiti kabagyan na gapu ta isu ti sigud a nagnaedan na.
Nupay kasta, maipagarop a sinaruno ti biktima ti suspek ken ditoy a naaddaan da ti nabara a diskusyon.
Inpakaammo ni Baltazar a basar kadagiti inyuswat da nga imbestigasyon ket ado dagiti banag a pagriririan ti biktima ken suspek.
Maipalagip a pimmusay ti biktima kabayatan ti pannakaagas na iti Governor Roque Ablan Sr. Memorial Hospital ditoy siudad ti Laoag gapu ti tama ti paltog iti muging na.
