LAOAG CITY – Agtultuloy pay laeng ti imbestigasyon dagiti kameng ti Philippine National Police ditoy ciudad ti Laoag ti napasamak a panagtagbat ken pammaltog iti Barangay Balatong ditoy ciudad.
Iti inisyal nga impormasyon, idi malem kalman ket ummuna a naireport iti pulisya nga adda ti napasamak a panagtagbat iti nasao a barangay.
Nabigbig ti biktima a ni Alex Domingo Bitagon, agtawen ti 69, balor idinto a suspek ket ni John Francis Baustista Bitagon, agtawen ti 34, awanan ti asawa ken agpada a residente iti nadakamat a lugar.
Naamoan a ti suspek ket nagturong iti pagtaengan ti biktima a nakaiggem ti buneng ken tinagbat na daytoy a nakatamaan ti ngato ti mata ti maseknan.
Dagus met a naitaray ti biktima iti ospital ken para iti pannakataming na ken iti agdama ket manarinaan ti panaglaing na.
Mainaig iti daytoy, idi rabii ket nagsubli ti suspek iti pagtaengan ti biktima ken rumrumuar a prinobokar na ti pamilya daytoy agingga a nagresponde dagiti otoridad.
Iti kaadda dagiti pulis iti nasao a lugar ket agresistir ti suspek nga agsardeng no sadinno nakaiggem daytoy ti buneng ken bato.
Rumrumuar a ginandat pay ti suspek a tagbaten ti maysa a pulis isut gapo na a pinaltogan ti maysa pay a kameng ti pulisya daytoy.
Naitaray met ti suspek iti ospital ngem naideklara a dead on arrival.
Kabayatanna, nakarekobre dagiti kameng ti Scene of the Crime Operatives (SOCO) ti uppat a kapsula ti 9MM a paltog, buneng ken ti bato.
