(Update)LAOAG CITY – Temporaryo a nawayaan ti suspek ti panagtatakaw a napasamak iti mismo a cuerpo ti pulisya iti ili a San Nicolas kalpasan a nakapagpiyansa iti a 8 ribo a pisos.
Nabigbig daytoy a ni Rodel Agsunod, addaan ti umno a tawen ken residente iti Bgy. 14 iti ili a Vintar.
Immun-una a naipila ti kaso a theft ken panagusar ti palso a nagan ti nasao a suspek iti piskalya ti probinsiya kalpasan a maipagarup a nagtakaw iti gamit ti maysa nga On the Job Trainee (OJT) iti nasao a cuerpo pulisya bayat a nakakustodyar met ti suspek gapu iti pannakatiliw na a nagmaneho iti motorsiklo a nabartek.
Maipalagip a maipagarup a kinaot ti suspek ti bag ti OJT bayat a nakabalod babaen iti pananggaw-at na bayat a nakaparabaw daytoy iti lamisaan nga adda iti asideg ti pagbaludan ket idi damagen da ti nagan na saan pay nga iti pudpudno a nagan na ti inusar na.
