LAOAG CITY – Napilaanen ti kaso a murder dagiti nabigbig a suspek ti pannakapapatay ken pannakaputol ti mabagbagi ti biktima a ni Prudencio Balicat, agtawen ti 58 ken residente ti Brgy Cabaruan, Bacarra, Ilocos Norte.
Segun kenni P/Chief Insp Angelo de Juan, hepe ti Investigation Section ti Ilocos Norte Police Provincial Office nabigbig ti suspek a ni Reynaldo Bungcayao alyas Rene Bungcayao, residente met laeng ti nasao a barangay kalpasan a simmuko ti maysa a testigo nga nakaimatang ti krimen.
Basar ti palawag ti testigo kadagiti otoridad, simmuko gapu ta saan a makaturturog iti naimatangan na a krimen.
Kuna ni de Juan, rumrumuar iti imbestigasyun nga love triangle ti motibo ti krimen gapu ta sobra ti imon ti suspek iti biktima gapu ta isu pay a gayyem na ti nangsulot iti nobya na.
Iti agdama ket birbiruken dagiti otoridad ti dua pay a suspek ti krimen.
Malagip a nabirukan laengen ti bangkay ni Balicat iti igid ti kalsada nga agturong iti barangay da ken nakita ti naputol a mabagbagi na iti abay ti ulo na itay kallabes a bulan ti Enero iti agdama a tawen.
