LAOAG CITY – Addan ti napilaan ti reklamo iti pannakapapatay ni retirado a P/Supt. Joeffrey Gorospe iti ili ti Sarrat.
Segun kenni PNP Provincial Dir. P/Sr/Supt. Jose Melencio Nartatez Jr., ti nagibasaran da iti panagpila ti reklamo kontra kadagiti suspek ket babaen ti panangitudo dagiti nakakita ti krimen.
Binigbig ni Nartatez dagiti suspek a da Felix Bermudez Jr. alyas Bongbong, Melody Malaqui alyas Lloyd ken tallo a sabsabali pay a dagitoy ket agindeg iti umabagatan a paset ti probinsiya.
Kuna na a kalpasan ti sumagmamano a tawen a panagim-imbestigaar da ket adda ti nagdur-asan na a nakaipilaan ti kaso a murder iti piskalya ti probinsioya kontra kadagiti maseknan.
Inlawlawag ni Nartez a dagiti suspek ket maibilang a “gun for hire”.
Nagtalinaed a tallo dagiti kitkitaen da a motibo iti pannakapapatay ni Gorospe, maysa iti panggep ti trabaho, love triangle ken ti bisyo na a panagpallot.
Maipalagip a napapatay itay kallabes ni Gorospe bayat a makitongtong kadagiti trabahador na iti maysa a kubokubo nga adda iti asideg ti pagtaengan na idiay Sarrat, Ilocos Norte.
