LAOAG CITY – Inpakaammu ti Presidential Anti-Organized Crime Commission (PAOCC) saan a kualipikado nga agbalin nga state witness ni suspended Bamban Mayor Alice Guo gapu iti illegal operations ti Philippine offshore gaming operator (POGO) hubs.
Inlawlawag ni Presidential Anti-Organized Crime Commission spokesperson Winston Casio a nasapa pay a mapagsasaritaan no mabalin nga agbalin nga state witness ni Guo gapu ta agparang manipud kadagiti naurnongda nga ebidensia a direkta a nairaman ni Guo iti illegal nga aktibidad dagiti naraid a dua nga illegal a POGO iti Zun Yuan Technology Inc. idiay Bamban ken Lucky South 99 idiay Porac, Pampanga.
Kinuna pay ti opisyal ti Presidential Anti-Organized Crime Commission a maysa ni Guo kadagiti nakabasol mainaig iti operasyon ti human trafficking ken scamming idiay Bamban ken posible met iti Porac.
Isu a tapno agbalin ni Guo nga state witness, masapul a saan a nakabasol, ngem maibasar kadagiti ebidensia, ti suspended mayor ti Bamban ket dakkel ti responsabilidad na kadagiti illegal a POGO.
Nupay kasta, inwaragawag pay ti Presidential Anti-Organized Crime Commission (PAOCC) nga ikonsiderarda ti panagbalin ni Guo nga state witness no mabalinna nga ipablaak na ti indibidual nga adda iti likudan ti nadakamat a krimen kontra kenkuana.
Maipalagip nga immuna a ginutigot ni Senador Sherwin Gatchalian ni Guo nga ipablaak ti “main players” kadagiti ilegal nga operasyon ti POGO.
