LAOAG CITY – Manamnama a maiyestablisar ditoy Ilocos Norte ti SAFE BBM wenno Sustainable Agriculture Farm Enterprise Bamboo Business Model.
Mainaig iti daytoy, inpakaammo ni Mr. Hashler Garalde, bamboo focal person ti Ilocos Norte a supsuportaran ni Gob. Matthew Marcos Manotoc ti pannakaipatungpal ti “tissue culture” ti kawayan ditoy Ilocos Norte a maawagan ti “beema bamboo”.
Impalgakna a mapagbalin a “pilot testing project” ti maipasdek iti Brgy. Camandingan ti siudad ti Batac.
Inlawlawagna nga aglawa daytoy ti sangapulo nga ektaria ken masarakan iti asideg ti “sanitary landfill” ti nadakamat a siudad.
Imbatad ni Garalde a ti “beema bamboo” ket babassit ngem alisto ti panagdakkelna a maiyasping iti bayog.
Kunana a napintas pay daytoy nga alternatibo a mausar a pagsungrod ti pugon a paglutoan ti tabako a dakkel a tulong tapno maliklikan ti panagpukan ti kaykayo.
Malaksid iti daytoy, inbunannagna a gapu ta napuskol ti lasag ti nasao a klase ti kawayan ket adu ti mabalin a pakausaranna.
Impalgakna a daytoy ti rason a pursigido ti gobernador a mangpaadu iti nasao a klase ti kawayan tapno ad-adu a kakailian ti matulungan a maaddaan ti nayun a pamastrekan.
Kabayatanna, inpakaammo ni Garalde nga adda ti Small Farm Reservoir iti lugar a pagmulaan ti “beema bamboo” ken mapagbalin pay daytoy a pagpadakkelan ti udang tapno ad-adu ti mabalin a pamastrekan dagiti kakailian.
