LAOAG CITY – Dinungpar ti maysa a private tricycle ti SUV iti paset ti Paco Roman St. Brgy. 11 ditoy Siudad ti Laoag.
Segun ken ni PCpl. Artemio Magaoay Jr., Duty Investigator ti Philippine National Police Laoag Traffic Division, nabigbig ti driver ti private tricycle a ni Jerimiah Agbayani y Bustamante, agtawen ti 20, awanan asawa ken residente ti Brgy. 23, Sitio Dungtal ditoy Siudad ti Laoag.
Idinto a nabigbig met ti nangiturong ti SUV nga agmaris ti gray a ni Gorgonio Malunao Jr. y Hermano, agtawen ti 56, agtawen ti 56 ken residente ti Brgy. 11 ditoy Siudad.
Inbatadna a basar iti naisayangkat nga imbestigasion, maibasar iti naala a kopya ti Close Circuit Television wenno CCTV camera ti pagtaengan ti akinkukua ti SUV ket bayat a dumaldalyasat ti private tricycle nga agturong nga agpa-amianan ket dita a kellaat dinungpar daytoy ti SUV.
Inlawlawagna nga adda ti lima nga indibidual a nakalugan iti private tricycle kadayta a gundaway idinto nga awan met iti SUV.
Kunana a mapan koma agmeryenda dagiti agpapagayam ngem saanen a natuloy gapu iti napasamak a desgrasia.
Inbagana a gapu iti impact ti desgrasia ket napitpit iti likod a paset ti SUV idinto a nadadael iti sango a paset ti private tricycle.
Inpalgakna nga awan met ti nasugatan kadagiti nakalugan iti private tricycle ken awan ti nakainom ti nasanger dagitoy.
Innayonna a rumrummuar iti imbestigasion a ti namunganayan ti desgrasia ket gapu iti kellaat a panangtalyaw ti driver a nangitunda ti pannakaidungparna iti SUV.
Kabayatanna, segun ken ni Malunao, akinkukua ti SUV nga adda pay ti gundaway a ginandat ti maseknan a driver ti private tricycle ti aglibas wenno itarayan ti napasamak a desgrasia ngem binugkawan daytoy ti anakna a rimuar iti pagtaenganda a manarimaan ti panangaramidna kadagiti reports-na iti pagadalan kadayta a gundaway.
Iti agdama, napan nagpa-estimate dagiti maseknan tapno ditoy a maammoan no mano ti bayadan ti driver ti private tricycle iti pannakatarimaan ti pannakadadael ti SUV.
