LAOAG CITY – Nagbaliktad ti SUV kalpasan a dinungparna ti maysa a tricycle iti national highway kangrunaanna iti Badoc Bridge iti Barangay Pasuc iti ili ti Badoc.
Segun ken ni P/Capt. Elison Pasamonte, Hepe ti Badoc Municipal Police Station, nabigbig ti driver ti SUV a Toyota Fortuner nga agmaris ti puraw a ni Lisa Andrea Romero y Indionela, agtawen ti 19 ken residente ti Poblacion 2 iti ili ti Pagudpud idinto a nabigbig met ti driver ti tricycle a ni Avelino Laforga, agtawen ti 73, naasawaan ken residente ti Barangay Pasuc iti ili ti Badoc ken ti pasaherona a ni Razel Fernandez, agtawen ti 51, naasawaan ken residente ti Barangay Parang iti ili ti Badoc.
Inbatadna a basar iti inwayatda nga imbestigasion, kabayatan a dumaldalyasat ti SUV nga agturong nga agpa-abagatan ket kellaat a napukawan ti kontrol ti manibela ti driver.
Gapu iti daytoy, kunana nga immagaw ti linya ti SUV a nangitunda ti panagdinnungparda iti sumungsungad a tricycle no sadinno a naitapwak iti rangtay ti tricycle driver.
Nagsagaba ti sugat iti nagduduma a paset ti bagi ti driver ti tricycle ken ti pasaherona nga insigida a naitaray dagitoy iti Corpuz Clinic and Hospital idiay Sinait, Ilocos Sur idinto ti driver ti SUV ken dagiti kakaduana ket nagsagaba met ti minor injuries.
Naammoan a rumrummuar iti imbestigasion a maipagarup a nakaturog ti driver ti SUV.
Kabayatanna, agtultuloy pay laeng ti naun-uneg nga imbestigasion dagiti otoridad maipanggep iti napasamak a desgrasia.
