LAOAG CITY – Naidungpar ti maysa nga SUV iti alad ti maysa a pagtaengan iti Barangay 48-A Cabungaan ditoy siudad ti Laoag.
Ti driver ti SUV ket residente iti ili ti Paoay.
Basar iti Laoag City Police Station, naggapu iti ili ti Bacarra ti nasao a driver ken rumrummuar a maipagarup a nabartek ken nakaturog daytoy a nangitunda ti pannakaidungparna.
Gapu iti daytoy, nairaman a nadungpar ti SUV ti naka-parking a kotse iti uneg ti pagtaengan.
Iti baet ti napasamak a desgrasia, saan a naan-ano ti driver ti SUV gapu ta adda ti airbag ti lugan a nangipaay proteksion kenkuana.
Kabayatanna, manamnama ti panagsinnarita ti driver ti SUV ken ti akinkukua ti pagtaengan a maysa nga inhinyero maipanggep iti napasamak a desgrasia.
