LAOAG CITY – Naidungpar iti dua a poste ti maysa nga SUV iti Barangay 2 Sta. Joaquina ditoy siudad ti Laoag.
Segun ken ni P/MSgt. Artemio Magaoay Jr., Duty Investigator ti Laoag City Police Station – Traffic Division, ti nangiturong ti SUV nga Eco Ford Sport ket maysa a babai, agtawen ti 36 ken residente ti Barangay Banban iti ili ti Bangui ken ti kaduana ket maysa a lalaki, agtawen ti 32, awanan asawa ken residente iti Barangay San Andres ditoy siudad ti Laoag.
Inbatadna a basar iti inwayatda nga imbestigasion, aggapu dagiti maseknan iti maysa a bar ket apaman a mapanda mangan ket ditoy a nairidep ti driver.
Gapu iti daytoy, kunana a napukawan ti kontrol ti manibela ti nangiturong ti lugan a nangitunda ti pannakadesgrasiada.
Agpada a nagsagaba ti sugat iti nagduduma a paset ti bagi dagiti dua a nakalugan iti SUV nga insigida a naitaray iti kaasitgan nga ospital.
Naammoan a nabartek dagiti maseknan idi napasamak ti insidente.
Iti agdama, adda dagiti sumagmamano a residente ti napukawan ti kuriente gapu iti panangdungpar ti SUV kadagiti dua a poste.
