LAOAG CITY – Nauram ti maysa a lugan nga SUV iti Brgy. Bobon iti ili ti Burgos.
Nabigbig ti driver ti SUV a Silver Metallic Mitsubishi Montero a ni Mc Teddy Garaza y Malacas, agtawen iti 32, awanan asawa, self-employed ken residente ti Brgy. Poblacion iti nasao nga ili.
Insigida a napan nagresponde ti Philippine National Police pakairamanan ti Bureau of Fire Protection iti ili ti Burgos iti nakapasamakan ti insidente.
Basar iti imbestigasion, apaman a simmangpet dagiti otoridad ket maur-uram pay laeng ti nasao a lugan nga addaan ti plate number nga IAI1297 no sadinno a dagusda met dagitoy a sinebseban.
Maibasar kadagiti otoridad, kabayatan a dumaldalyasat ti nadakamat a lugan iti agkurba a paset ti national highway nga agturong nga agpa-amianan ket maipagarup a nakaturog ti driver a nangitunda ti pannaka-overshoot daytoy iti sabali a linya ti kalsada.
Gapu iti daytoy, naidungpar ti lugan iti poste a rason ti pannakauramna iti paset ti Bobon Elementary School.
Naammoan a nakaro a nadadael ti lugan idinto a saan a naan-ano ti driver daytoy.
Kabayatanna, naduktalan dagiti otoridad a human error ti rason ti napasamak a desgrasia idinto ti pannakauram ti lugan ket gapu iti short electrical circuit wiring.
