LAOAG CITY – Dumanon iti nasurok 100 a ribu a pisos ti balor dagiti natakaw a laptop ken dadduma pay iti Suyo National High School iti ili ti Dingras.
Segun ken ni Police Major Norman Pentang, ti Hepe iti Philippine National Police iti nasao nga ili, basar iti insayangkatda nga imbestigasion ket natakaw ti uppat nga hard drives ken maysa a nangisit nga ACER laptop iti Supply Room, maysa a nangisit a Dell Laptop, maysa nga hard drive, ti Central Processing Unit wenno CPU ken memory storage ti Close Circuit Television system iti nasao a pagadalan pakairamanan ti nasurok nga innem a ribu a pisos a kuarta a napukaw iti MAPEH wenno Canteen Room.
Inbatadna a kabayatan ti panangiwayatda ti inspeksion iti kadagiti nadakamat a pangopisinaan ti pagadalan ket naobserbaranda ket napuersa a nalukatan dagiti ridaw dagitoy ket naimatanganda nga agkaiwara dagiti kagamitan iti uneg dagiti maseknan nga opisina.
Inlawlawagna a saanna pay a masinunuo no mano ti bilang dagiti suspek nga adda iti likudan iti nasao nga insidente gapu ta manarimaan pay laeng ti maisaysayangkat a naun-uneg nga imbestigasion.
Inpalgakna a pinuted dagiti saan pay a nabigbig a suspek ti cable ti internet connection no sadino karaman pay nga intarayda ti hard drive ti Close Circuit Television iti nasao a pagadalan.
Inbagana nga ibilangna nga eksperto dagiti suspek gapu ta nadalus ti panangserrek dagitoy kadagiti nagduduma nga opisina ti pagadalan.
Mainaig iti daytoy, kuna ni Police Major Pentang a naginterbyuda kadagiti saksi ken dagiti mangisursuro tapno makaala ti naan-anay pay a detalye maipapan iti napasamak a panagtatakaw.
Innayonna nga adda met ti Security Guard iti nasao a pagadalan ngem naka-duty laeng daytoy para iti aldaw.
Kabayatanna, naammoan a nakaawat ti tawag ti Philippine National Police iti ili ti Dingras nga adda ti pagadalan a natakawan babaen ken ni Brgy. Chairman Amando Taylan Jr.
Immuna iti daytoy, adda ti naisayangkat a panagpatrolya dagiti pulis iti Suyo National High School ngem awan met ti nariparda a naidumduma a pasamak.
