LAOAG CITY – Inpakaammo ni Ms. Shey Pia Abaya, assistant Manager iti Public Employment Service Office ditoy ciudad ti Laoag a maiyur-uray paylaeng ti 40% ti sweldo nga aggapo iti Department of Labor and Employment dagiti batch 3 ti Special Program for Employment of Students wenno (SPES) ditoy ciudad.
Segun kenkuana, iti batch 1 ken 2 ti Special Program for Employment of Students ditoy ciudad ket naiteden ti 60% ti sweldo da manipod iti gobierno lokal idinto a iti 40% nga aggapo iti Department of Labor and Employment ket maiyur-uray paylaeng.
Inpakaammo ni Abaya nga inaldaw ti panangi-follow up da iti daytoy tapno al-alisto ti pannakaipaay amin ti sweldo dagiti Special Program for Employment of Students ditoy ciudad.
Nupay kasta, kuna ni Abaya nga agpapan ita ket awan pay ti update ti Department of Labor and Employment no kaano da nga ipaay ti nayun a sweldo dagiti Special Program for Employment of Students ditoy ciudad.
Inadmitir na a mabain payen kadagiti estudyante a benepisyaryo ti programa gapu ta saan laeng nga isuda mangdamdamag iti nayun ti sweldo da no di ket uray dagiti nagannak da.
