LAOAG CITY – Inalerto ti National Disaster Risk Reduction and Management Council dagiti residente iti aglawlaw ti Taal Volcano gapu iti baro nga steam-driven wenno phreatic a panagbettak.
Basar iti nakalap nga impormasion ti ahensia manipod iti National Disaster Risk Reduction and Management (NDRRM), immuna a nairekord ti panagbuga ti abo iti 8:50AM agingga 8:52AM ken napasarunoan ti agarup alas-9:09AM agingga 9:12AM.
Mainaig iti daytoy, naabisoan dagiti residente a liklikanda nga umasideg iti bulkan.
Nupay man posible pay daytoy a mapasarunoan, saan met a makita iti agdama a dumanon iti magmatic eruption.
Iti kinapudnona, awanen ti nairekord a panagdayyeg iti napalabas a nagpatnag a maysa nga indikasion ti posible a napigsa a panagbettak.
Malaksid iti panagbuga ti abo, maob-obserbaran pay ti panagmaga dagiti sumagmamano a paset ti caldera daytoy ken dadduma pay nga abnormalidad.
Nagtalinaed met a “no man’s land” ti island volcano gapu iti peggad a mabalin a mapasamak kadagiti agturong ditoy.
