LAOAG CITY – Kanayun a panangdenggeg ken pannagsurot kadagiti balakad ti coach ti napateg tapno maasa a naimbag ti laing iti aniaman nga sports kas iti taekwondo.
Daytoy ti inbatad ni Mr. Kurt Jyrus Emboltura, Cadet Black Belt iti Philippine National Taekwondo Team, agtawen ti 14 ken tubo iti ili ti Vintar ken manamnama a lumaban idiay Vietnam ita a bulan.
Iti eksklusibo nga interview ti Bombo Radyo Laoag ken ni Emboltura, kuna na nga innem ti tawen na idi nangrugi nga agay-ayam ti taekwondo.
Mainaig iti daytoy, inbatad ni Emboltura nga iti panagay-ayam na ti taekwondo ket kangrunaan nga ispirasyon dagiti nagannak kenkuana kasta met iti nalakatak a taekwondo player Kurt Barbosa.
Inbatad na a narigat ti taekwondo idi damo na a sinerrek daytoy ngem ad-adda a naasa ti laing na babaen iti trainor na a ni Mr. June Bumanglag.
Immuna iti daytoy, inpakamamo ti ubing a taekwondo player nga adon dagiti nakilabanan na a kompetisyon, iti abroad man wenno ditoy Pilipinas.
Kabayatanna, Manamnama nga agturong ni Emboltura iti Vietnam intuno Agosto 21.
Innayun na nga ipagpannakkel na met ti bagbagi na gapu ta ammo na a nagrigatan na ti pwesto na iti taekwondo iti agdama.
