LAOAG CITY – Dinayyeg ti magnitude 6.6 a gingined ti Taiwan idi rabii ti Sabado basar iti Philippine Institute of Volcanology and Seismology (PHIVOLCS).
Iti advisory nga inruar ti Philippine Institute of Volcanology and Seismology, ti gingined ket napasamak agarup alas-11:05 ti rabii ken naammoan a ti sentro daytoy ket 24.65°N, 122.04°E, agarup 429 a kilometro iti amianan nga amianan a laud a paset ti Itbayat, Batanes.
Basar iti United States Geological Survey (USGS), ti epicenter ti gingined ket adda ti 31 a kilometro iti daya nga abagatan a daya ti Yilan, Taiwan ken adda ti kauneg nga 68 a kilometro.
Gapu iti daytoy, nairekord idiay Basco, Batanes ti Intensity I, ti kababaan a tukad iti Philippine Institute of Volcanology and Seismology Earthquake Intensity Scale a mangipasimudaag ti nakapsot a panagdayyeg a saan a marikna ti kaaduan kadagiti residente.
Awan ti nairekord a pangta ti tsunami ti nasao a gingined.
