LAOAG CITY – Kinondenar ti Taiwan ti Somalia gapu iti panangipawil na kadagiti travelers nga addaan ti Taiwanese passports a sumrek ken lumasat iti East African country.
Ti nasao nga addang ket nagepekto idi laeng miyerkules kalpasan a nangiparuk-at ti pammilin ti Somali aviation authorities iti napalabas a lawas.
Agpapan ita ket awan pay ti komento ti Somalia iti nasao nga addang, idinto a ti Taiwan a maibilang kas self-ruled island a tagtagikwaen ti China, ket ad-adda pay a pinapigsa na ti relasyon da iti Somaliland.
Maipalagip a ti Somaliland ket nakisina iti Somalia addan 34 a tawen ti napalabas ngem nagtalinaed nga arigna saan a bigbigbigen ti intero a lubong.
Idi 2020, nangipatakder ti Somaliland ken Taiwan iti embahada iti kabisera iti tunggal maysa a nakapungtutan nga agpada ti China ken Somalia.
