LAOAG CITY – Immapela ti Taliban idiay Afghanistan ti international support kalpasan ti napasaran da a magnitude 6.1 a gingined.
Segun kadagiti opisyal, nasurok sangaribo dagiti natay ken 1,500 ti nasugatan gapo iti gingined no sadinno a ti Paktika province ti kangrunaan a naapektaran.
Inbatad ni Abdul Qahar Balkhi, senior Taliban official, ti gobierno da ket adda iti babaen ti sanctions rason a daytoy ket marigatan da a makaipaay ti tulong pinansyal kadagiti tattao a kangrunaan nga agkasapulan.
Nupay kasta, kunana a maragsakan da ken napalaos ti panagyaman da gapo iti ipapaay a tulong dagiti kabangibang a pagilyan, regional ken world countries.
Inlawlawag na a kasapulan ita ti naan-anay a tulong gapo ta ti nasao a gingined ket saan da a napasaran iti napalpalabas a dekada.
Karaman met kadagiti maipaaay a tulong partikular ti Pakistan ket ti panangipatulod na kadagiti medical teams pakairamananen ti medical supplies.
Mainaig iti daytoy, saan pay a nalawag no mano ti eksakto a bilang dagiti tattao a nagaburan kadagiti narba a pasdek.
Malaksid iti daytoy, nakumpirmaran pay a narigat ti rescue operations gapo iti mapaspasaran a napigsa a tudo.
Gapo iti daytoy, naamoan a no adda ti maisalakan ket dagiti helicopter ti mangitulod kadakuada kadagiti ospital.
Maipalagip a dinayyeg ti magnitude 6.1 a gingined ti Afghanistan no sadinno kaadoan kadagiti natay ket manipud iti Gayan ken barmal districtsti Paktika.
