LAOAG CITY – Natiliw dagiti tallo a babbai gapu ti panagsugal a nagay-ayam da ti tong-it iti Brgy. 8 Sulongan iti ili ti Pasuquin.
Nabigbig dagiti nagsusugal a da Rosalinda Castro y Corpuz, agtawen ti 46, balo; Lorilyn Ruiz y Geralde, agtawen ti 50, naasawaan, residente iti Brgy. Susugaen iti nasao nga ili kenni Merly Valdez y Ventura, agtawen ti 50, naasawaan ken residente iti Brgy Estancia iti nasao nga ili.
Segun kenni Police Capt. Christian Felix, hepe ti PNP Pasuquin, maisagsaganan ti maipila a reklamo a panagsalungasing iti PD 1602 wenno illegal gambling kalpasan ti pannakatiliw dagiti tallo a babbai.
Kuna na a maidalan iti inquest proceeding intono bigat.
Immunan a narekobre dagiti otoridad ti agdagup ti 98 a pisos, baraha, ken dadduma pay.
Inbatad ni Felix a damo a matiliw dagiti maseknan gapu ti panagsugal.
Mainaig iti daytoy, naiget ti panagpatrolya ti PNP kadagiti nasusulimek a barangay malaksid iti sentro ti Pasuquin tapno malappedan dagiti panagsusugal ken anyaman a dakes a pasamak.
