LAOAG CITY – Naipisoken iti pagbalodan ti tallo a babbai a nagtakaw kadagiti tagilako ti SM Hypermarket ditoy ciudad ti Laoag.
Nabigbig dagitoy a da Lilibeth Sumague, 37, awanan asawa; Loraine Magno, 40, awanan asawa; kenni Merla Gonzales, 42, awanan asawa, agpapada a residente ti Liwanag St. Brgy Old Balara, Quezon.
Basar ti imbestigasyon, bayat nga agsursursur ti security guard iti maikatlo a kadsaaran ket nakita na nga insabukel dagiti suspek dagiti tagilako iti uneg ti bado da.
Naamoan nga apaman a rumuar dagiti suspek iti nasao a pasdek negosyo ket nasiputan ti security guard a mangmonmonitor kadakuada ken idi sinada na dagitoy iti ruwar ti establisyimento ket sinaludsod na ti resibo ngem awan iti maipakita da.
Gapu iti daytoy, pinakapkapan na iti lady guard dagiti suspek ket ditoy a nakumpiskar dagiti insabukel da.
Nakumpiskar manipod kadagiti suspek ti 6 a pares ti bra, 5 a pidaso ti blouse, 2 a girls sando shirt ken 8 a pidaso ti lady pajama ken agdagup dagitoy ti 5894.75 a pisos.
Iti agdama, maisagsagana ti maipila a kaso kontra kadagiti suspek.
