LAOAG CITY – Natiliw dagiti tallo a babbai gapu iti illegal a panagsusugal da iti paset ti Barangay Brgy. 6, San Juan Bautista iti ili ti San Nicolas.
Segun iti PNP, adda ti naawat da nga impormasyon mainaig iti illegal a panagsusugal dagiti suspek nga agpapada a residente iti ili ti San Nicolas.
Iti panagresponde dagiti otoridad ket naaktwan da dagiti suspek nga agay-ayam ti “tong-its”.
Nakumpiskar pay dagiti kameng ti pulisya iti lugar ti maysa a set ti baraha, maysa a lamisaan, tallo a monobloc chairs ken ti 1,470 a pisos a maipagarop a pusta dagiti suspek.
Maisagsaganan ti reklamo a panaglabsing iti Presidential Decree 1602 wenno Illegal Gambling kontra kadagiti nasao a suspek.
