LAOAG CITY – Nag-courtesy call iti Sangguniang Panlalawigan dagiti baro nga schools superintendent ditoy probinsya bayat iti regular sesyon.
Dagiti nasao nga opisyal ti Department of Education ket isuda Atty. Donato Balderas, baro nga schools division superintendent ti DepEd Ilocos Norte, Dr. Anselmo Aludino, baro nga schools division superintendent iti Batac City ken ni Dr. Joan Corpuz, ti schools division superintendent iti DepEd Laoag City.
Mainaig iti daytoy, inpaayan ti hunta probinsyal dagiti tallo nga schools superintendent ti gundaway a makapagsarita bayat iti sesyon.
Dita nga inpadanon ni Atty. Balderas ti panagyaman iti naited a gundaway a makapagserbi iti probinsya ni Presidente Ferdinand Marcos Jr. idinto a kiniddaw ni Dr. Corpuz ti agtultuloy a suporta ti Sannguniang Panlalawigan kenkuana kas idi isuna pay laeng ti schools superintendent ti DepEd Ilocos Norte.
Kabayatanna, inbunannag ni Dr. Aludino a pakaidaydayawan na ti agserbi iti DepEd Batac City nga isu met ti hometown ti presidente.
Mangnamnama met ti gobierno probinsyal a babaen kadagiti nasao nga opisyal ket adda iti nasayaat nga ima dagiti agad-adal.
