LAOAG CITY – Natakawan iti tallo a taraken a kalding dagiti residente iti Brgy. Parado iti ili ti Dingras.
Daytoy ti inpakaammo ni Pol Capt. Norman Pentang, ti chief of police iti ili ti Dingras.
Inbatad ti opisyal nga immunan nga adda ti napasamak a panagtakaw iti napalabas a tawen iti nasao a barangay nu sadinno a ti nagbalin a biktima ket maysa a brgy. captain.
Innayon na nga iti nasao a panagtakaw ket sigud a nasolbar iti biang ti barangay gapo ta napagtutulagan da a bayadan lattan ti nagtakaw dagiti kalding ti biktima.
Kabayatanna, inbutaktak ni Pentang nga ita a bolan ket adda manen iti napasamak a panagtakaw no sadinno a tallo a kalding iti natakaw iti met laeng nadakamat a barangay.
Inpalgak ni Pentang a ti suspek iti immuna a panagtakaw ket isu met laeng ti nangala kadagiti tallo a kalding iti napalabas a lawas iti nadakamat a barangay.
Segun kenni Pentang, naamoan da a maymaysa laeng iti paglaklakoan ti suspek kadagiti taktakawen na a kalding a daytoy ket binigbig na a maysa a brgy. kagawad iti Brgy. Peralta iti ili ti Dingras.
Mainaig iti daytoy, inpakaammo ni Mr. Jimmy Aguinaldo, dati a sangguninang bayan member iti nasao nga ili ken residente iti Brgy. Parado a 3 a menor de edad dagiti suspek no sadinno a 2 kadagitoy ket agtawen laeng iti 17 ken maysa ti agtawen iti 19.
Inbutaktak na a saan laengen nga iti barangay da laeng ti nagtakawan dagiti suspek iti kalding gapu ta adda pay ti damag a nagtakaw dagitoy iti Brgy Medina iti met laeng nasao nga ili.
Innayon na a ti buyer ket maymaysa ken inimbitaran ti barangay tapno agatendar iti taripnong ngem saan a napan nagpakita.
