LAOAG CITY – Nagrarambol dagiti tallo a kameng ti konseho ditoy ciudad ti Laoag bayat ti kaadda da iti Laoag City Hall iti oras ti alas-7:19 ita laeng a rabii.
Inbatad ni Police Lt. Col. Amador Quiocho, ti chief of police ditoy ciudad ti Laoag a basar iti panangrebisar da ti CCTV Footage a nakaimuntar iti sango ti Laoag City Hall, immuna a rimuar ni Sang Panlungsod member Edison Bonoan ken napan a dagus naglugan iti service vehicle na.
Kalpasan ti lima a minutos ket rimuar iti lugan ni Konsehal Bonoan ken nagpaala ti tugaw.
Ditoy metten a rimuar iti City Hall dagiti aguliteg a da Sang Panlungsod Member Edison Chua ken ti kaanakan na a ni Sang Panlungsog member Justine Chua, kadua da da Sang Panlungsod Member Jaybee Baquiran ken Sang Panlungsod Member RB Ablan ken nagderderesto da a naglugan
Iti kaaddan da Konsehal Justine Chua iti lugan na ket ditoy metten a napan dinanog ni Konsehal Bonoan.
Gapu iti daytoy, napan insalakan ni Konsehal Edison Chua ti kaanakan na a rimmaman met ti kaanakan ni Konsehal Bonoan nga isu ti driver na ket ditoyen a napasamak ti rambol.
Inbatad ni Quiocho a basar iti CCTV Footage ket nadanug ti kaanakan ni Konsehal Bonoan ni Konsehal Edison Chua.
Saan met a nakita iti CCTV footage no dinanog met ni Konsehal Justine Chua ni Konsehal Edison Bonoan.
Rumrumuar a sakbay ti nasao a pasamak ket adda ti saan a nagkikinnaawatan dagiti maseknan kabayatan ti session da mainaig ti pannaka-aprubar ti prangkisa ti tallo a tricycle ngem ti maysa ket naibabawi gapu ta adda ti problema ti papeles na.
Segun ken ni Quiocho, kalpasan ti rambol ket agpapada a nagpaeksamen iti ospital dagiti maseknan tapno maamoan no ania ti sinagaba da.
Innayon ni Quiocho a basar iti obserbasyon na ket adda ti sugat iti pispis ni Konsehal Justine Chua.
Kabayatanna, iti papan panagpa-blotter dagiti aguliteg a Chua ket binayabay ida da Konsehal Baquiran ken Konsehal Ablan.
