LAOAG CITY – Insigida a nareliboan ti tallo a kameng ti Pasuquin Municipal Police Station gapu iti maipagarup a panangdangran ken panangtutukda ti paltog kadagiti residente a nagkamang iti kuerpo ti pulisia.
Segun ken ni P/Maj. Sheryl Guzman, pannakangiwat ti Ilocos Norte Police Provincial Office, dagiti nasao a pulis ket Patrolman, Police Corporal ken Police Master Sergeant.
Inbatadna a malaksid kadagiti tallo a pulis ket karaman pay ni P/Maj. Jonevale Maramag ti agdama nga Hepe ti Pasuquin Municipal Police Station a nareliboan.
Inlawlawagna nga insigida a nabilin dagiti tallo a pulis nga ag-report wenno agpalawag iti napasamak iti Philippine National Police – Regional Office I idinto a ni P/Maj. Maramag ket insigida a naidesignar iti Ilocos Norte Police Provincial Office.
Kabayatanna, naiget a kinondenar ni P/Maj. Guzman dagiti maseknan a pulis ken nasken nga inpakatda latta koma ti maximum tolerance dagitoy iti baet ti situasionda.
Maipalagip nga adda ti naipatulod a bidyu ditoy Bombo Radyo Laoag no sadinno a mabuya ditoy ti saan a napintas a panangakomodar dagiti tallo a pulis kadagiti sumagmamano nga indibidual a nagkamang iti kuerpo ti pulisia tapno agpatulong kadakuada.
Immuna iti daytoy, basar iti inparuk-at a press statement ni PBGen. Lou Evangelista, Regional Director ti Police Regional Office I nga addan ti pammilinna a mangiwayatda nga insigida ti imbestigasion mainaig iti insidente.
