LAOAG CITY – Mapagpilpilian ti tallo a kandidato nga agbalin a maikawalo a Presidente ti Mariano Marcos State University.
Segun ken ni Prof. Herdy Yumul, Director ti Office for Strategic Communication iti nasao nga unibersidad, dagiti nangipila ti kandidaturana ket isuda Dr. Nathaniel R. Alibuyog, Vice President for Research, Development and Innovation iti MMSU; Dr. Virgilio Julius P. Manzano Jr., Vice President for Planning and Strategic Foresight iti MMSU ken Dr. Jonar I. Yago, Vice President for Research, Extension and Training iti Nueva Vizcaya State University.
Inlawlawagna a daytoy nga aldaw ket ipresentarda dagiti kalikagum ken planoda para iti unibersidad babaen ti Public Forum no sadinno a dagiti kangrunaan a makipaset ket dagiti MMSU stakeholders.
Inbatadna a kalpasan ti forum ket adda ti manamnama a closed door panel interview babaen kadagiti miembro ti Search Committee for President nga idadauloan ni Atty. Ryan Estevez, OIC Executive Director IV, CHED UniFAST.
Innayonna a kalpasan dagitoy ket sumaruno a maisayangkat ti panangpili ti Board of Regents ti pinal a madutokan a Presidente.
Kabayatanna, maiyuswat ti panagpili ti baro a Presidente ti Mariano Marcos State Uiversity kalpasan a nadutokan ti dati nga MMSU President a ni Dr. Shirley C. Agrupis kas Commission on Higher Education Commissioner iti kallabes.
