LAOAG CITY – Nasugatan dagiti tallo a lallaki kalpasan ti napasamak a desgrasya iti paset ti Barangay Quiling Sur iti ciudad ti Batac.
Nabigbig dagitoy a da Rodrigo Sumauang y Villanueva, 63, naasawaan, civil engineer, tubo idiay Malate Manila ken residente iti MMSU Compound iti nasao a barangay ken ni Martin Derek y dela Cruz, 25, addaan ti live in partner, buko vendor ken residente iti Barangay San Pedro iti nasao a ciudad ken ti lubbon na a ni Reggie Ballesteros y Bugayon, 34, buko vendor, tubo idiay Brgy. Calbeg, Malasiqui, Pangasinan ken residente iti Brgy. Tabug iti met laeng nadakamat a ciudad.
Iti imbestigasyon dagiti kameng ti PNP-Batac, agpadaya a direksyon ni Sumauang idi nakadinnungpar na da Derek a naggapo iti laud a direksyon.
Gapo iti daytoy, nagsagaba ni Sumauang ti sugat ti bibig ken nagduduma a paset ti bagi na idinto a da Derek ken Ballesteros ket nagsagaba ti sugat iti ulo.
Dagus met a naitaray dagiti biktima iti Mariano Marcos Memorial Hospital and Medical Center babaen kadagiti nagresponde a paramedics.
