LAOAG CITY – Balligi a naarestar dagiti tallo a lallaki gapo iti panagsusugal da iti maysa a minatayan iti Barangay Barbaqueso iti ili ti Carasi.
Nabigbig dagitoy nga isuda Jun Ramon, agtawen ti 22, maysa a security guard ken residente iti Barangay Virbira, Carasi; Denz Joeffrey Sapajo, agtawen ti 28, naasawaan ken residente iti Barangay Catagtagen iti ili ti Banna ken ni Christopher Andres, agtawen ti 27, naasawaan ken residente iti Barangay Sta. Maria iti ili ti Piddig.
Segun kenni Police Captain Cesar Mangaoil, ti chief of police ti PNP-Carasi, naaktuan da ti panagsusugal dagiti tallo nga indibidwal.
Inbatad na a nabayagen nga adda ti report seknan iti panagsusugal ngem no agresponde da ket saan da a maaktuan agingga a natiliw dagitoy itay parbangon.
Nakumpiskar dagiti otoridad ti maysa a set ti baraha, lamisaan, kasta met ti kwarta a pusta.
Iti agdama ket manarimaanen ti pannakaisagana dagiti dokumento para iti pannakaipila ti reklamo a panagsalungasing iti PD 1602 wenno iligal a panagsusugal kontra kadagiti tallo a natiliw.
