LAOAG CITY – Inyistorya ti agtawen ti 17 a lalaki iti Barangay Payak iti ili ti Bangui ti maipagarop a panangdangran kenkuana ti kapitan, tanod ken ti maysa pay a lalaki.
Segun iti menor de edad, idi nalpas ti pasken ket napan nagtugaw iti igid ti kalsada iti 11:30 iti rabii ket lumabas ti barangay tanod a ni Jener Martinez ken ti kabsat na a ni Jennifer Martinez a nakamotorsiklo ngem inparking da ti lugan da iti abay na.
Inlawlawag na a ditoy a kellaat lattan a maipagarop a dinanog ni Jener isuna idinto a ni Jennifer ket binekkel na ti menor de edad isut gapo na a limmaban.
Inbatad na a kalpasan ti sumagmamano a minutos ket dimteng ti kapitan ngem imbes a naganawa ket maipagarop a dinanog na ti likod ti lapayag na.
Gapo iti daytoy, kunana a nagtartaray ngem nangeg ti maysa kadagiti pagayam na ti rakurak ni Jennifer a nabayagen a kurkursunadaen da daytoy wenno trip da laeng dagiti maseknan ti panangdangran da kenkuana.
Inpetteng na a saan a nagprobokar ken awan ti ammo na nga inaramid na a rason kuma dagiti maseknan a nangdangran kenkuana.
Mainaig iti daytoy, kunana a nagsasarita da iti ummuna a gundaway ngem maipagarop a sabali ti inbagbaga a rason dagiti maak-akusatan.
Desidido ti menor de edad a mangipila ti reklamo kontra kadagiti maipagarop a nangdangran kenkuana.
Kabayatanna, ikarkarigatan met ti Bombo Radyo nga alaan ti komento ni Barangay Chairman Michael Salutal pakairamanen dagiti dua pay a maak-akusaran.
