LAOAG CITY – Nagkarambola ti tallo a lugan iti Rodolfo F Fariñas Bypass Road iti Brgy. 57 Pila ditoy siudad ti Laoag.
Ti nangiturong ti SUV a Totoya Vios ket agtawen ti 26 ken residente ti Brgy. 13 Naglicuan iti ili ti Pasaquin.
Ti nangiturong ti kotse nga Honda CRV ket agtawen ti 78 ken residente ti Brgy. 6 ditoy siudad ti Laoag.
Ti nangiturong met ti Electric Bicycle ket adda ti umno a tawen ken ti kaduana a nakalugan nga agtawen ti 14 nga agpada dagitoy a residente ti Brgy. 61 Cataban ditoy siudad ti Laoag.
Basar iti Laoag City Police Station, kabayatan a dumaldalyasat ti SUV iti Rodolfo F Fariñas Bypass Road nga agturong nga agpa-laud idinto a ti kotse ken Electric Bicycle ket agturong iti barangay road ti Brgy. 57 Pila ditoy siudad ti Laoag.
Naammoan nga immuna a nagdinnungpar ti SUV ken kotse agingga a napukawan ti kontrol ti manibela ti nangiturong ti SUV a nangitunda ti panangdinnungparda met iti Electric Bicycle.
Kabayatanna, amin dagiti maseknan a nakalugan kadagiti tallo a behikulo ket agpapada a naitaray iti Gov. Roque Ablan Sr. Memorial Hospital para iti naan-anay a pannakatamingda.
