LAOAG CITY – Naisalakan dagiti tallo nga agkakabagyan a mangngalap kalpasan a nasarakanda nga agtatapaw iti kabaybayan a sakupen ti Pronbisya.
Nabigbig dagitoy a da Corajel Carolino, agtawen ti 58; Ace Carolino, agtawen ti 36; ken Ramon Fernandez, agtawen ti 58 ken agpapada dagitoy a residente iti ili ti Bolinao, Pangasinan.
Iti pannakiuman ti Bombo Radyo Laoag ken ni Lt. Joseph Christian M. Sagun – Provincial Commander Coast Guard iti Ilocos Norte, dagus a nagturong da iti lokasion dagiti tallo a mangngalap kalpasan nga impakaammo ti Philippine Navy ti sitwasyon da iti 30 a nautical miles manipud iti kabaybayan iti ili ti Curimao.
Babaen ti tulong ti tug boat manipud iti Omnico port, naisalakan ti Phil. Coast Guard dagiti tallo a mangngalap, uppat a kilometro ti kaadayona iti kabaybayan iti ili ti Badoc.
Maibasar iti statement dagiti mangalap, saanda a napakpakadaan ti isasangpet ti Bagyo Enteng idi pimmanawda idi Agosto 29 idiay Pangasinan, isu nga idi agsublida kalpasan a nakadanonda iti kabaybayan a sakupen ti Magsingal, Ilocos Sur idi Setyembre 2, ket nagbaliktad ken naarinebneb ti bangka da gapu ti napigsa a dalluyon, no sadinno a kimmapet da laeng iti bangka da agingga a nakadanon da iti kabaybayan a sakupen ti Ilocos Norte.
Kuna da a ti laeng tudo ti inpapauneg da iti uneg ti tallo aldaw a nagtatapaw da iti taaw.
Apaman ti napasamak nga insidnete, ket inlawlawagda nga adda nakakita kadakuada a maysa a transiting vessel a MV Zarita, nga agturong idiay Indonesia.
Naammuan a ti mismo MV Zarita ti nagreport iti Philippine Navy tapno maispal dagiti nasao a mangalap.
Dagus met a naipan dagiti tallo iti Rural Health Unit iti ili ti Curimao ken addadan iti nasayaat a kasasaadda ngem kasapulan pay laeng nga aginanada nga tapno maisubli ti pigsada.
Kabayatanna, nakiuman metten ti Coast Guard Station Ilocos Norte iti Coast Guard Station Pangasinan tapno makaawiden dagiti nasao a mangalap.
