LAOAG CITY – Kinumpirmaran ni Commander Laurel Paul Mariano iti Philippine Coastguard (PCG) iti ili ti Currimao nga adda ti tallo a mangngalap a balligi a naisakalan kalpasan a naisadsad dagitoy iti probinsya ti Ilocos Sur.
Binigbig ni Mariano dagiti mangngalap nga isuda Feligrino Annaya, agtawen ti 67, Wilfredo Potlay, agtawen ti 69 kenni Oligario de Claro agtawen ti 72, agpapada a residente iti Poblacion 2 iti ili ti Currimao.
Inbatad ni Mariano a naisadsad dagiti maseknan iti kabaybayan a paset ti Brgy. Pug-os, Cabugao, Ilocos Sur gapu iti panagperdi ti makina ti bangka a naglugananda.
Immuna iti daytoy, inlawlawag ni Mariano a nagturong iti taaw dagiti maseknan idi rabii.
Nu pay kasta, kuna na nga agingga itay aldaw ket saan a pulos a nagsubli dagitoy iti ili ti Currimao.
Kabayatanna, inbatadna a namoan laeng a naisadsad dagitoy kalpasan a nakaawatda ti report manipod iti PCG Ilocos Sur.
Inpakaamo ni Mariano a nagtalinaed iti PCG Ilocos Sur ti bangka idinto a nakaawiden ditoy probinsya dagiti mangngalap ken manamnama a maisubli da iti bukod da a pamilya kalpasan ti medical examination.
Mainaig iti daytoy, nagpalagip ti opisyal a nu bilang adda dagiti pakdaar mainaig iti gale warning ket saan nga ipilit ti mapan iti taaw tapno maliklikan ti aniaman a pasamak.
