LAOAG CITY – Addan ti tallo nga indibidual a pimmusay ditoy probinsya gapu iti leptospirosis.
Daytoy ti kinumpirmaran ni Doctor Rickson Balalio, ti mangidadaulo iti Provincial Health Office.
Segun ken ni Balalio, dagiti pimmusay gapu iti leptospirosis ket agpapada a mannalon no sadinno a maysa ti aggapo iti ili ti Vintar ken ti dua ket residente iti ili ti San Nicolas.
Mamati ni Balalio a naala dagiti biktima ti sakit iti taltalon ken mabalin a naladaw da a nagpakonsultar iti doktor.
Gapu iti daytoy, inbalakad ni Balalio a no makarikna ti sintomas iti sakit a leptospirosis kas iti panaggurigor, panag-yellow ti mata, ken dadduma pay ket agpakonsultar a dagus iti doktor tapno maliklikan ti pannakairisgo ti biag.
Inpakaammo ni Balalio a basar iti datos ket addan ti 20 a kaso ti leptospiros ditoy probinsya manipod idi bulan ti Enero agingga iti Hulyo 31 iti agdama a tawen, no sadinno a dagiti mannalon a naapektaran ti sakit ket naggapu iti ciudad ti Laoag, iti ili ti Bacarra, Pagudpud, Pasuquin, Vintar, Banna, Currimao, Dingras, Marcos, Nueva Era, San Nicolas ken iti ciudad ti Batac.
Inpalagip ni Balalio nga adda ti libre nga agas a mabalin a dawaten dagiti umili iti Municipal Health Office iti bukod da a lugar tapno maprebentaran ti impeksyon.
Kunana a saan a kasapulan ti inaldaw a panagtumar ti agas no di ket umanayen iti maminsan iti kada lawas.
