LAOAG CITY – Naipaima iti Department of Social Welfare and Development (DSWD) dagiti tallo a menor de edad ken maysa nga agtawen ti 19 kalpasan a natiliw da gapu iti papanda panangserrek ti storage room iti Laoag International Airport (LIA) ditoy ciudad ti Laoag.
Nabigbig dagiti suspek babaen ti naimuntar a CCTV camera iti nasao nga storage room ti erupuerto.
Segun ti report, nakigtot ni Mrs. Mineth Esmundo, 44, naasawaan, general manager iti Northern Aviation Ground Support Services a nakabase iti LIA kalpasan a nakita na a nadadael dagiti sumagmamano nga equipment da iti storage room ken adda pay dagiti mapukpukaw.
Iti panagimbestigar dagiti otoridad ket nabigbig da dagiti suspek babaen ti CCTV a naimuntar iti nadakamat a lugar.
Naamoan nga iti pannaimbestigar dagiti suspek ket adda pay dagiti inbutaktak da a kakadwa da a residente met laeng iti Barangay 35, Gabu Sur ditoy ciudad.
Nagtalinaed dagiti suspek iti biang ti DSWD ken manamnama a mapilaan da amin ti reklamo a theft.
