LAOAG CITY – Rinespondean dagiti kameng ti PNP Piddig iti napasamak nga aksidente iti Sitio Malaquinanao, Brgy. Boyboy iti nasao nga ili.
Kinumpirmaran ni P/Capt. King Ramos, COP ti PNP Piddig a tallo a menor de edad nga estudyante ti Piddig National High School iti karaman iti nasao nga aksidente.
Segun kenni Ramos, taga Brgy. Estancia, Piddig dagiti dua a menor de edad idinto a taga Brgy. Boyboy ti maysa.
Basar iti imbestigasyon, kalpasan ti klase dagiti nadakamat a menor de edad ket dimmagas da pay laeng a nangan iti maysa a carinderia sakbay da a nagawid.
Kunana a liniklikan dagiti tallo iti checkpoint iti national highway rason a nagna da iti Brgy. Mangitayag.
Bayat a daldalyasaten da iti nasao a dalan ket dita a naawanan ti kontrol ti manibela rason a naidungpar dagitoy iti maysa a balay.
Gapu iti daytoy, nagsagaba iti sugat ti rupa ken muging ti maysa idinto a gasgas laeng dagiti kakadwa na.
Innayon na a napataray iti panagmaneho da iti barangay road nupay awan met iti suot nga helmet dagiti maseknan.
Nakikoordinaren ti PNP iti nasao a pagadalan tapno mabalakadan dagiti estudyante tapno saanen a maulit ti nasao a pasamak.
