LAOAG CITY – Nasugsugatan dagiti tallo a menor de edad a naglugan iti motorsiklo kalpasan a naipasirok iti bus bayat a dumaldalyasat iti paset ti Brgy. 16 iti ili ti San Nicolas.
Segun ti PNP-Traffic Division iti nasao nga ili, agpada nga agpaabagatan ti motorsiklo nga inturong ti maysa a menor de edad ken addaan ti dua a lubbon a pada na met laeng a menor de edad pakairamanan ti bus nga inturong ti agtawen ti 29 a lalaki.
Iti naiyuswat nga imbestigasyon, agpada a ginandat dagiti dua a behikulo ti ag-overtake ngem dita metten a naawanan ti kontrol ti nangiturong iti motorsiklo rason a naipasirok iti bus.
Gapu iti daytoy, nagsagaba ti sugat iti nagduduma a paset ti bagi dagiti naglulubbon iti motorsiklo idinto a saan a naan-ano ti driver ti bus.
Naitaray a dagus dagiti biktima iti Rural Health Unit iti ili ti San Nicolas ngem naiyakar dagitoy iti Governor Roque Ablan Senior Memorial Hospital ditoy siudad para iti naan-anay a pannakataming da.
