LAOAG CITY – Nakairekord ti Office of the Civil Defense Region I ti tallo a minor damages ditoy probinsya ti Ilocos Norte gapu idadayyeg ti magnitude 5.8 a gingined.
Segun ken ni Adreanne Pagsolingan ti Spokesperson, Office of the Civil Defense Region I, maysa a mall manipud iti ili ti San Nicolas, maysa a government facility iti ili ti Bangui ken ti Sta. Monica Church iti ili ti Sarrat.
Idinto nga iti probinsya ti La Union ken Ilocos Sur ket awan met ti nairekord a nadadael ngem ado dagiti nagdannag iti napasamak a gingined.
Kunana a mannarimaanen ti assessment dagiti Municipal Disaster Risk Reduction and Management Office para iti balor dagiti nadadael.
Mainaig iti daytoy, inbatad ni Pagsolingan nga awan ti nagbalin nga evacuees ken nadangran iti napasamak a gingined.
Ngem nu pay kasta, nagballaag daytoy iti publiko iti posible nga aftershocks.
Mainaig iti daytoy, inpakaammu met ti Mr. Hendrick Pedronan, ti mangidadaulo iti Municipal Disaster Risk Reduction and Management Council iti ili ti Pagudpud nga adda maysa a balay a nag-collapse ti diding na iti Barangay Baduang, ngem awan met ti nadangran.
Kabayatanna, inpasigurado met ni Pagsolingan a naka-blue alert ti Office of the Civil Defense Region I iti panagadu ti turista ken bakasyunista ditoy Rehiyon Uno sumagmamano nga oras sakbay ti isasarabo ti baro a tawen.
