LAOAG CITY – Nauram dagiti tallo a pagtaengan iti Sitio 7, Taguiporo, Barangay 23, Sta. Cecilia iti ili ti San Nicolas.
Nabigbig dagiti agtagikwa kadagiti nauraman a pagtaengan a da Shirley Pidi, Ronnie Pagadoan ken ni Precy Pagadoan.
Segun kenni Mr. Nestor Dumlao a residente iti nasao a barangay, manarimaan ti panagbomba na para iti danom idi kellaat a nagikkis ti asawa na gapo ta maur-uramen ti kaabay da a pagtaengan isut gapo na a dagus na nga inruwar ti lugan na.
Kunana a saan a magabenan dagiti residente a mangsebseb iti apoy gapo iti kinabara na ken dakkelen ti apoy.
Mainaig iti daytoy, inbatad ni Barangay Chairman David Pascua, ummuna a nauram ti pagtaengan ni Shirley Pidi agingga a nairaman dagiti dua pay a pagtaengan.
Inlawlawag na nga apaman a naamoan da ket intawag da a dagus kadagiti maseknan a BFP.
Naamoan a karaman kadagiti nauram ket sumagmamano a sako ti irik.
Agpapan maisursurat ti damag ket saan da pay nga ammo no anya ti namunganayan ti nasao nga uram ken adda metten ti inisyal a naipaay a tulong manipud iti DSWD kadagiti nauraman.
Kabayatanna, karaman kadagiti katulungan ti BFp-San Nicolas a nangsebseb iti apoy ket ti BFP ket ti Solsona, Dingras, Sarrat, Batac, Laoag.
