LAOAG CITY – Natiliw dagiti tallo a lallaki babaen iti nagtitipon a pwersa ti CIDG Ilocos Norte PFU (Lead unit), PNP-Paoay ken PIU INPPO gapu iti illegal a panagay-ayam da ti billiards iti Barangay Dolores iti ili ti Paoay.
Daytoy ti inpakaammo ni Police Major Romnick Subia, PNP-CIDG ditoy probinsya.
Inbaga na a dua kadagiti suspek ket agpada a laborer idinto a ti maysa ket awanan ti trabaho, agpapada nga addaan iti umno a tawen ken residente da iti nasao nga ili.
Nakumpiskar dagiti otoridad iti lugar ti maysa a set ti billiards ball; 4 a pedaso ti billiard cue stick; maysa a pedaso ti horse shoe handler head wenno “tiririt”; maysa a black/red leather sling bag para iti cue stick; maysa a billiard chalk tisa; maysa a triangle billiard rack; ken ti P2,360.00) a maipagarop a pusta dagiti suspek.
Iti agdama ket nagtalinaed dagiti suspek iti kustodyar ti PNP-CIDG ken manamnama a mapilaan da ti reklamo a panaglabsing iti Presidential Decree (PD) 1602 wenno illegal a panagsugal.
