LAOAG CITY – Naipaayan ti tallo a Sea Ambulance iti Ilocos Norte iti kaunaan a gundaway no sadinno a naipaima dagitoy iti ili ti Pagudpud, Pasuquin ken ditoy ciudad ti Laoag
Iti turnover ceremony, inbatad ni Dra. Paula Paz Sydiongco, ti Department of Health, Regional Director – Ilocos Norte a ti pannakaipaay ti tallo a sea ambulance ditoy probinsya ket paset ti Health Facilities Enhancement Program ti Department of Health.
Inpakaammo ni Sydiongco a ti sea ambulance ket addaan ti stretcher, automatic external defibrillator, nebulizer, portable suction machines, oxygen cylinder, ken dadduma pay a medical equipment ken accessories.
Mainaig iti daytoy, nagyaman ni Ilocos Norte 1st District Representative Sandro Marcos iti Department of Health ken iti opisina ni Senador Sonny Angara gapu iti agtultuloy a suporta na iti probinsya.
Inpanakkel pay ti kongresista a daytoy ti kaunaan a gundaway iti pakasaritaan ti Ilocos Norte a nakaawat ti sea ambulance.
